Sunday, March 28, 2010

Is your computer gets heated?


கணினி அதிகம் வெப்பமடைகிறதா?

கணினியின் உள்ளேயிருக்கும் இலத்திரனியல் பாகங்கள் வெப்பத்தை உருவாக்கக் கூடியன. அவை இயங்கும் போது அதிகமான வெப்பத்தை வெளி விடுகின்றன. அதிக வெப்பம் காரணமாக கணினியின் உள்ளுறுப்புகள் பாதிப்படையக் கூடிய வாய்ப்புள்ளது

கணினி அளவுக்கதிகமாக வெப்பமடைகிறது என்பதை எவ்வாறு அறிந்து கொள்வது? கணினி இயங்கிக் கொண்டிருக்கும்போது திடீரென இயக்கம் நின்று விடுமானால் கணினி அதிக வெப்பமடைந்துள்ளது என்பதைப் புரிந்து கொள்ளுங்கள். கணினியில் நீலத்திரை தோன்றுதல், மற்றும் அடிக்கடி நினைவகத்தில் ஏற்படும் பிழைச் செய்திகள் என்பன ஏனைய அறிகுறிகளாகும்.

கணினி அதிக வெப்பமடைவதற்குப் பல காரணங்களைக் குறிப்பிடலாம். சீபியுவின் மேல் பொருத்தப் பட்டிருக்கும் ஹீட் சிங்க் (heat sink) , கூலிங் பேன் மற்றும் வெப்பத்தை வெளி விடக் கூடிய கணினியின் வேறு பாகங்களில் தூசு படிதலே கணினி வெப்பமடைவதற்ககான பொதுவான காரணியாகும்.

கணினி வெப்பமடையும்போது அதனைக் குளிர வைக்கக கூடிய வகையில் முறையாகக் கணினி வடிவமைக்கப்படாததும் ஒரு காரணியாகும். எனினும் தற்காலக் கணினிகளில் இந்தக் குறைபாடு இல்லை எனலாம்.


ஒரே நேரத்தில் ஒன்றுக்கு மேற்பட்ட செயற்பாடுகளில் கணினி ஈடுபடும் போது சிபீயூவின் வேலைப் பழு அதிகரிக்கிறது இதன் காரணமாகவும் சீபியூ அதிக வெப்பத்தை வெளி விடுகிறது. கணினி அதிக வெப்பமடைவதால் கணினி மதர்போட் சேதமடைவதோடு சீபீயு மற்றும் விடியோ காட் கூட பாதிக்கப்படலாம். அது தவிர அதிக வெப்ப மடைவதால் கணினி இயங்கும் வேகமும் மந்தமடையும். எனவே கணினியைக் குளிர்ச்சியாக வைத்திருப்பதன் மூலம் கணினியை வேகமாக இயங்கும்படி செய்யலாம்.

சரி. கணினியைக் குளிர்ச்சியாக வைக்க என்ன செய்யலாம்?

கணினியைக் குளிர வைப்பதற்கான வழிகளில் முக்கியமானதாக விசிரிகளில் படியும் தூசுகளை அவ்வப்போது அகற்றிக் கொள்ளுங்கள்

மின் வழங்கி (Power Supply Unit) மற்றும் சீபியுவில் பொருத்தப் பட்டிருக்கும் விசிரிகளிலிருந்து அதிக இரைச்சல் வருமாயின் அவை முறையாக இயங்கவில்லை என்பதை உணர்ந்து கொள்ளுங்கள். எனவே அதற்குப் பதிலாக புதிய கூலிங் பேன் ஒன்றை வாங்கிப் பொருத்திக் கொள்ளுங்கள்.

சிபியுவின் மேல் உள்ள ஹீட் சிங்கில் தடவப்படும் (thermal grease) ஒரு வகைப் பதார்த்தம் உலர்ந்து விடுவதாலும் சீபீயூ வெப்பமடைவது அதிகரிக்கும். எனவே அதனை அவதானித்து அதன் மேல் புதிதாக அந்தப் பதார்த்தத்தைத் தடவிக் கொள்ளுங்கள்.

கணினி சிஸ்டம் யூனிட்டை (system Unit) திறந்த நிலையில் இருந்தால் அதனை மூடிக் கொள்ளுங்கள். திறந்திருக்கும் போது இலகுவாக வெப்பம் வெளியேறும் என நீங்கள் நினைக்கலாம். ஆனால் Case திறந்திருக்கும் போது கணினியின் உட்புற பாகங்களில் அதிக தூசு படிவதற்குக் காரணமாய் அமைகிறது.


அதிக வெப்பமடையக் கூடிய மற்றும் தூசு படியக் கூடிய இடங்களிலிருந்து கணினியை நகர்த்தி விடுங்கள். வெப்பம் வெளியேறத் தக்கவாறு கணினியைக் காற்றோட்டமுள்ள ஓர் இடத்தில் வையுங்கள்.

கனினியின் உள்ளே குளிர் காற்றை செலுத்தக் கூடியவாறும் உள்ளேயிருந்து வெப்பக் காற்றை வெளியேற்றக் கூடியதாகவும் கேசில் முடியுமானால் இரண்டு விசிரிகளைப் பொருத்திக் கொள்ளுங்கள்.
"
தற்போது பயன்பாட்டிலுள்ள அனேகமான மதர்போர்டுகளில் வெப்ப நிலையை கண்டறியக் கூடிய வெப்ப உணரிகள் (sensors) சீபியுவின் கீழ், ஹாட் டிஸ்கின் அருகில், மற்றும் வெப்பத்தை வெளி விடக் கூடிய வேறு உள்ளுறுப்புக்ளின் அருகே பொருத்தப்பட்டுள்ளன.

கணினி மதர்போர்டிலுள்ள பயோஸ் (BIOS) எனும் சிப், சிபியூவினால் (CPU) தாங்கக் கூடிய உச்ச அளவு வெப்பத்தை உணர்ந்து அதற்கு மேல் வெப்பம் அதிகரிக்கும்போது கணினியின் இயக்கத்தை நிறுத்தி விடுகிறது. இதன் மூலம் கணினியின் முக்கிய பாகங்கள சேதமடைவது தவிர்க்கப்படுகிறது. உங்கள் கணினி அடிக்கடி இயக்கம் நின்று போகுமானால் கணினியின் வெப்ப நிலையை அளவிட்டு அதனைக் குறைப்பதற்கான முயற்சியை மேற் கொள்ளுங்கள்.

கணினி வெப்ப நிலையை அறிவதற்கான மென்பொருள் கருவிகள் விண்டோஸ் இயங்கு தளத்துடன் கிடைப்பதில்லை. எனினும் ஏராளமான மூன்றாம் தரப்பு நிறுவனங்கள் இதற்கான மென்பொருள் கருவிகளை உருவாக்கியுள்ளன. சில மென்பொருள் கருவிகள் வெப்ப நிலையை கண்டறிவது மட்டுமல்லாமல் அதனைக் குறைப்பதற்கான வசதியையும் தருகின்றன.

அவற்றுள் SpeedFAN எனபது ஒரு சிறந்த கருவி எனலாம். அது பல்வேறு சாதனங்கள் பயன்படுத்தும் மின் சக்தியின் அளவுகளையும் அளவிடுவதோடு சீபீயுவைக் குளிர்விக்கும் விசிரியின் (cooling fan) வேகத்தையும் கட்டுப் படுத்துகிறது.

-அனூப்-

Sunday, March 21, 2010

What is Character Map?

எதற்கு இந்த Character Map?

விண்டோஸ் இயங்கு தளத்துடன் வெளிவரும் ஒரு பிரபலமில்லாத சிறிய மென்பொருள் கருவியே கேரக்டர் மேப். இது விண்டோஸின் ஆரம்ப காலப் பதிப்பு முதல் தற்போதைய விண்டோஸ் 7 வரையிலான அனைத்து பதிப்புகளிலும் இடம் பெறும் ஒரு பயனுள்ள யூட்டிலிட்டியாகும்.

கீபோர்டில் இல்லாத விசேட குறியீடுகளையும் பிற மொழி எழுத்துக்களையும் உள்ளீடு செய்யும் வசதியை இந்தக் கேரக்டர் மேப் தருகிறது. கேரக்டர் மேப்பானது எம்.எஸ்.வர்டில் இன்சர்ட் மெனுவின் கீழ் வரும் சிம்பல் (Symbol) எனும் கருவிக்கு நிகரானது.

அனேகமான பொண்ட் (Font) பைல்கள் வழமையான எழுத்துருக்களுடன் வேறு பல விசேட குறியீடுகளையும் கொண்டிருக்கும். இவற்றைக் கேரக்டர் மேப் மூலம் பார்வையிடுவதோடு தேவையான குறியீட்டை தெரிவு செய்து எமது ஆவணத்தில் பிரதி செய்து கொள்ளவும் முடியும்.

கேரக்டர் மேப்பை நீங்கள் விண்டோஸ் எக்ஸ்பீயில் All Programs-Accessories-System Tools- ஊடாக அணுகலாம். விண்டோஸின் வேறு சில பதிப்புகளில் சிஸ்டம் டூல்ஸில் அல்லாமல் நேரடியாக Accessories லிருந்தும் அணுக முடியும். ரன் கமாண்ட் மூலம் கேரக்டர் மேப்பை அடைவதற்கு charmap என ரன் பொக்ஸில் டைப் செய்யுங்கள்.

தேவையான குறியீடுகளை டொகுயுமெண்டில் நுளைப்பதற்கு முதலில் கேரக்டர் மேப் விண்டோவில் உரிய குறியீட்டின் மேல் இரட்டை க்ளிக் செய்ய வேண்டும் அல்லது Select பட்டனில் க்ளிக் செய்து கொள்ள வேண்டும். பின்னர் Copy பட்டனில் க்ளிக் செய்ய விண்டோஸ் க்ளிப் போர்டில் (Clipboard) அது சேமிகப்படும்.

பின்னர் அதனை டொகுயுமெண்டில் சேர்ப்பதற்கு கேரக்டர் மேப் விண்டோவை மினிமைஸ் செய்து விட்டு அதனைப் பிரதி செய்து கொள்ள வெண்டிய எப்லிகேசனைத் ஆரம்பிக்க வேண்டும்.. உதாரணமாக எம்.எஸ். வர்ட் ஆவணமொன்றில் ஒரு குறியீட்டை சேர்ப்பதற்கு அதனை நுளைக்க வேண்டிய இடத்திற்கு கர்சரை நகர்த்தி Edit மெனுவில் Paste தெரிவு செய்ய வேண்டும் அல்லது கீபோர்டில் Control + V அழுத்த வேண்டும்..

உங்களுக்குத் தேவையான விசேட குறியீடு குறிப்பிட்ட ஒரு பொண்டில் இல்லையாயின் பொண்டை மாற்றிக் கொள்ளுங்கள். ஒரே நேரத்தில் ஒன்றுக்கு மேற்பட்ட குறியீடுகளையும் தெரிவு செய்து கொள்ளலாம.

சில குறியீடுகளை கேரக்டர் மேப்பத் திறக்காமலேயே கீபோர்டில் உள்ள இலக்கங்களை டைப் செய்வதற்கென வரும் நியூமெரிக் கீபேட் (Numeric Keypad) மூலமாகவும் நுளைக்கலாம். சில விசேட குறியீடுகளை நீங்கள் அடிக்கடி உபயோகிப்பவரானால் கேரக்டர் மேப்பை விட விரைவாக அதனைப் பெற்றுக் கொள்ளலாம். ஆனால் அந்த குறியீட்டுக்குரிய இலக்கத்தினை நீங்கள் அறிந்திருக்க வேண்டும். ஒவ்வொரு குறியீட்டினையும் குறிக்கும் இலக்கங்களை (Keystroke) அக்குறியீட்டினைத் தெரிவு செய்யும்போது கேரக்டர் மேப்பின் வலது பக்க மூலையில் காண்பிக்கப்படும்.

நியூமெரிக் கீபோட் மூலமாக குறியீடுகளை நுளைக்கும்போது கீபோர்டில் உள்ள Num Lock கீயை On நிலையில் வைப்பதோடு ‘Alt’ கீயை அழுத்தியவாறே உரிய இலக்கத்தை டைப் செய்ய வேண்டும்.

உதாரணமாக ‘Alt’ கீயுடன் நியூமெரிக் கீபேடில் 0169 என டைப் செய்ய © எனும் குறியீடு தோன்றும்.

கேரக்டர் மெப்பில் Advanced View தெரிவு செய்வதன் மூலம் ஒரு பொண்டிலுள்ள விசேட குறியீடுகளை நாணயங்கள், கணித குறியீடுக:ள் என பல வகைப்படுத்தலாம். அதற்கு எட்வான்ஸ்ட வியூ தெரிவு செய்து Group by எனுமிடத்தில் Unicode Subrange தெரிவு செய்ய எனும் Group by எனும் தலைப்பிலான மற்றுமொரு சிறிய விண்டோ தோன்றும். அதில் குறியீடுகள் வகைபடுத்தப் பட்டிருக்கும்.

எந்த ஒரு பொண்டிலும் காணப்படாத விசேட குறியீடுகளை நீங்களாகவே உருவாக்கிக் கொள்ளக் கூடிய வசதியையும் விண்டோஸ் தருகிறது. கேரக்டர் மேப்புடன் பயன் படுத்தக் கூடிய Private Character Editor எனும் அதிகம் பிரபல்யமில்லாத இந்த மென்பொருள் கருவி பற்றி மற்றுமொரு ஐடி வலத்தில் பார்ப்போம்.

 -அனூப்

Sunday, March 14, 2010

How to find the IP address of a website

ஒரு இணைய தளத்தின் IP முகவரியை அறிந்து கொள்வதெப்படி?

ஒவ்வொரு இணைய தள முகவரியின் பின்னாலும் நான்கு பகுதிகளைக் கொண்ட ஒரு இலக்கத் தொகுதி மறைந்திருக்கிறது என்பதை நீங்கள் அறிவீர்களா? இதனை ஐபி முகவரி ( IP Address ) எனப்படும். ஒரு இணைய தளத்தின் ஐபி முகவரியைக் கொண்டு அந்த இணைய தளம் குறித்த பல தகவல்களைப் பெறலாம். ஒரு இணைய தளத்தின் ஐபி முகவரியை அறிந்திருந்தால் அதனைக் கொண்டே அந்த இணைய தளத்தை அடையலாம். ஆனால் இந்த ஐபி முகவரியை வெப் பிரவுஸரில் காண்பிப்பதில்லை.

ஒரு கணினி வலையமைப்பில் அல்லது இணையத்தில் இணைத்திருக்கும் ஒவ்வொரு கணினியும் ஒரு இலக்கத்தைக் கொண்டிருக்கும். அந்த இலக்கத்தை வைத்தே ஒவ்வொரு கணினியும் இனங் காணப்படுகின்றன இதனையே ஐபி முகவரி எனப்படுகிறது. இங்கு IP என்பது Internet protocol எனபதைக் குறிக்கிறது. அந்த இலக்கம் ஒரு வலையமைப்பில் அந்த குறிப்பிட்ட ஒரு கணினியை மட்டுமே குறித்து நிற்கும். இன்னொரு கணினிக்கு அதே இலக்கம் வழங்கப் படமாட்டது.. இதனை ஆங்கிலத்தில்; uniqueness எனப்படுகிறது.

இணையத்தில் இணையும் ஒவ்வொரு முறையும் எமது கணினிக்கு இந்த ஐபி முகவரியை இணைய சேவை வழங்கும் நிறுவனம் வழங்குகிறது.. இது ஒரு தற்காலிகமான ஐபி முகவரியே. அடுத்த முறை இணையத்தில் இணையும் போது வேறொரு ஐபி முகவரியே நமக்குக் கிடைக்கும், இதனை டைனமிக் ஐபி முகவரி (Dynamic) எனப்படும். அதேவேளை இணையத்தில் நிரந்தரமாக இணைந்துள்ள சேர்வர் கணினிகள் ஒரு நிலையான (Static) ஐபி முகவரியைக் கொண்டிருக்கும்.

ஒரு ஐபி முகவரி 216.27.61.137 எனும் வடிவத்தில் இருக்கும். இது நான்கு பகுதிகளைக் கொண்டிருக்கும். ஒரு புள்ளி கொண்டு இந்த நான்கு பகுதிகளும் பிரிக்கப்படிருக்கும். ஒவ்வொரு பகுதியும் 0 முதல் 255 வரையிலான ஒரு இலக்கமாக இருக்கும். ஐபி முகவரிகள் நமது வசதிக்காக தசம் எண்களினாலேயே குறிக்கப்படுவது வழக்கம். எனினும் கணினி இந்த இலக்கங்களை பைனரி வடிவத்திலேயே புரிந்து கொள்கிறது,

ஒரு டொமேன் பெயரை ஐபி முகவரியாக மாற்றும் செயற்பாடனது இணையத்தில் இணையும் ஒவ்வொரு சந்தர்ப்பத்திலும் உங்கள் கணினியிலேயே நடை பெறுகிறது. ஐபி முகவரியைக் கண்டறிவதற்கான வழி முறைகள் ஏராளம் உள்ளன. அதனைப் பற்றிச் சொல்வதற்கு முன்னர் ஒரு இணைய தள முகவரியின் பகுதிகள் எதைக் குறிக்கிறது எனப் பார்ப்போம்.

இணைய தளமொன்றின் ஒரு பக்கத்தைக் குறிக்கும் முகவரியை Uniform Resource Locater (URL) எனப்படுகிறது. ஒரு URL ஆனது http://www.pgsedu.com/center.html எனும் வடிவில் இருக்கும். இங்கு http என்பது என்ன ப்ரொட்டோகோல் (Protocol) என்பதையும் pgsedu.com என்பது டொமேன் பெயரையும் (Domain Name) center.html என்பது அந்த இணைய பக்கத்தின் அமைவிடத்தையும் (location) குறிக்கிறது.

ப்ரொட்டோக்கோல் என்பது இணையத்தில் பயன்படுத்தப்படும் ஒரு விதி முறையாகும். http (Hypertext Transfer Protocol) என்பது சேர்வர் கணினியுடன் இணைப்பை ஏற்படுத்துவதற்கான விதி முறைகளைக் கொண்டுள்ளது.

ஒரு இணைய தள முகவரியில் டொமேன் பெயரைக் கொண்ட பகுதியே ஐபி முகவரியைக் கொண்டுள்ளது. இங்கு ping எனும் கட்டளையைப் பயன் படுத்தி ஐபி முகவரியை அறிந்து கொள்வதற்கான வழி முறையை விளக்கலாம் என நினைக்கிறேன். Ping எனும் கட்டளை வேறு பல தேவைகளுக்காகப் பயன் பட்டாலும் ஐபி முகவரியையும் அதன் மூலம் இலகுவாகவும் விரைவாகவும் அறிந்து கொள்ளலாம். அதற்கு இணையத்தில் இணைந்திருக்க வேண்டும் என்பதையும் நினைவில் கொள்ளுங்கள்.

முதலில் ஸ்டார்ட் பட்டனில் Run தெரிவு செய்யுங்கள். ரன் பொக்ஸில் cmd என டைப் செய்து கமாண்ட் ப்ரொம்ப்டுக்குள் நுளையுங்கள். அங்கு C:\>ping pgsedu.com என டைப் செய்து எண்டர் கீயை அழுத்துங்கள். அப்போது அந்த இணைய தளத்துக்குரிய ஐபி முகவரியை அறிந்து கொள்ளலாம்.

இங்கு Pinging pgsedu.com [172.43.133.152] with 32 bytes of data:எனும் முதல் வரியிலேயே pgsedu.com எனும் டொமேன் பெயருக்குரிய ஐபி முகவரியைக் [172.43.133.152] கொண்டுள்ளது..

ஒரு டொமேன் பெயருக்குரிய மேலதிக தகவல்களை அறிய வேண்டுமானால் அதற்கான கருவிகளும் இணையத்தில் ஏராளம் உள்ளன. அவற்றில் samspade.org எனும் இணைய தளம் இந்த சேவையை இலவசமாக வழங்குகிறது.
 -அனூப்-

Monday, March 08, 2010

Ware.. Ware…Ware ?


என்ன இந்த வெயர்… Ware… வெயர் ?

ஹாட்வெய்ர்-Hardware (வன் பொருள்) எனும் கணினியின் பௌதீக உறுப்புகளுக்கு உயிர் கொடுக்கும் பல ப்ரோக்ரம்களை உள்ளடக்கிய ஒரு தொகுப்பையே சொப்ட்வெயர்-Software (மென்பொருள்) எனப்படுகிறது.

இந்த சொப்ட்வெயரிலும் பல வகைகள் உள்ளன. கணினியை முழுமையாக தனது கட்டுப் பாட்டில் வைத்திருக்கும் மென்பொருளை சிஸ்டம் ஸொப்ட்வெயர் / System Software (இயங்கு தளம்) எனப்படுகிறது. விண்டோஸ் மற்றும் லினக்ஸ் என்பவற்றை இதற்கு உதாரணமாகக் குறிப்பிடலாம்.

பயனருக்குத் தேவையான பணிகளை கணினி மூலம் செய்து கொள்ளக் கூடிய மென்பொருள்களை எப்லிகேசன் சொப்ட்வெயர் (Application Software) எனப்படுகிறது. எம்.எஸ்.வர்ட், போட்டோ ஷொப் என ஏராளம் மென்பொருள்களை இதற்கு உதாரணமாகக் கொள்ளலாம்.

அனேகமான எப்லிகேசன் ஸொப்ட்வெயர் வியாபார நோக்கில் உருவாக்கப்படுவதோடு சில மென்பொருள்கள் இலவச பயன் பாட்டுக்கெனவும் உருவாக்கப்படும். அவ்வாறே நமது கணினியை இயங்க விடாமல் முடக்கும் வண்ணமும் நமது கணினிச் செயற்பாட்டை அவதானிக்கும் வண்ணம தீய நோக்குடனும்கூட சில ப்ரோக்ரம்கள் உருவாக்கப்படும்

மெல்வெயர் 
கணினிக்குப் பாதிப்பை ஏற்படுத்தும் நோக்கில் உருவாக்கப்படும் எந்த வகையான ப்ரோக்ரம்களையும் மெல்வெயர் Malware எனப்படும். மெலிசஸ் சொப்ட்வெயர் (Malicious Software) எனும் பதங்களிலிருந்தே இந்த மெல்வெயர் எனும் சொல் உருவானது வைரஸ், வேர்ம், ஸ்பைவெயர் போன்ற அனைத்தும் மெல்வெயர்களே. இவ்வாறான ப்ரோக்ரம்கள கணினிப் பயனராலேயே எதிர்பாராத விதமாக நிறுவப்பட்டு விடும். பிரவுஸரின் ஹோம் பேஜ் மாறுதல், (இதனை பிரவுசர் ஹைஜெக்கிங் எனப்படும்) புதிதாக டூல் பார்கள் தோன்றுதல் பொப் அப் விண்டோக்கள் தோன்றுதல் பிரவுஸர் முடங்கி விடுதல் போன்றன பொதுவான மெல்வெயர் அறிகுறிகளாகும்.

ஸ்பைவெயர்
ஸ்பைவெயர் (Spyware) என்பதும் தீய நோக்குடன் உருவாக்கபப்டும் ஒரு மென்பொருளே. இது கணினியில் ஊடுறுவி உங்கள் நடவடிக்கைகளை வேவு பார்க்கிறது. கீலொக்கர் (Key Logger) எனபது பொதுவான ஒரு ஸ்பைவெயர் ஆகும். இது கீபோர்டில் நீங்கள் அழுத்தும் விசைகளைப் பதிவு செய்கிறது. இதன் மூலமாகாவே இணையத்தினூடு வழங்கப்படும் வங்கிக் கணக்கு விவரங்கள் அடுத்தவர் கையில் சிக்குகிறது. சில ஸ்பைவெயர் மென்பொருள்கள் உங்கள் இணைய செயற்பாடை அவதானிக்கும். இவ்வாறு திருட்டுத்தனமாகப் பெறப்படும் தகவல்களைக் கொண்டு அந்த ஸ்பைவெயரை உருவாக்கியவர் உங்கள் விருப்பு வெறுப்புகளுக்கேற்ப இணையத்தினூடு பொருட்களை விறபனை செய்ய முயற்சிப்பார்.

எட்வெயர்
எட்வெயர் (Adware) எனப்படுவதும் மெல்வெயர் வகைகளில் ஒன்றே. எட்வெயர் எனும் பெயரைக் கொண்டே அது விளம்பரங்களைத் தாங்கி வரும் ஒரு ப்ரோக்ரம் என்பதை யாரும் இலகுவில் புரிந்து கொள்ளலாம். அனேகமான இலவச மென்பொருள்களுடன் எட்வெயரும் இணைக்கப் பட்டிருக்கும். உதாரனமாக யாஹூ மெஸ்சென்ஜர், விண்டோஸ் லைவ் மெஸ்ஸென்ஜர் மென்பொருள்களில் இந்த எட்வெயரைக் காணலாம். சில மென்பொருள்களை நிறுவும்போது எட்வெயரை பயனர் விருப்பத்திற்கேற்ப நிறுவும் வகையில் தெரிவுகள் இருக்கும். எனினும் சில மென்பொருள்கள் எம்மை அறியாமலேயே எட்வெயரையும் நிறுவி விடும்.

ஷெயாவெயர்
ஷெயாவெயர் (Shareware) என்பதை நீங்கள் அடுத்தவர்களுடன் பகிர்ந்து கொள்ளக் கூடிய மென்பொருள் என யூகித்தால் உங்கள் யூகம் தவறானது. ஷெயாவெயரை ட்ரையல் வெயர் (Trialware) எனவும் அழைக்கப்படும். ஒரு மென்பொருளை உருவாக்கும் ஒரு நிறுவனம் அதனை விற்பனை செய்யும் ஒரு உத்தியாக அம்மென்பொருளை குறிப்பிட்ட சில நாட்களுக்கு இலவசமாகப் பயன் படுத்த அனுமதிக்கும். அந்த மென்பொருளைப் பரீட்சித்துப் பார்க்க நினைக்கும் ஒருவர் அந்நிறுவன இணைய தளத்திலிருந்து இலவசமாக அதனை டவுன்லோட் செய்து அதனைக் கணினியில் நிறுவிக் கொள்ளலாம்.

குறிப்பிட காலக்கெடு முடிவடைந்த பின்னர் அதனைப் பயன் படுத்த விரும்பினால் அதற்குரிய கட்டணத்தைச் செலுத்த வேண்டும். இந்த கால எல்லையானது குறைந்தது மூன்று நட்களிலிருந்து 30 நட்கள் வரையும் இருக்கலாம். சில ஷெயாவெயர் மென்பொருள்கள் அதனை குறிப்பிட்ட தடவைகள் மாத்திரம் திறந்து பணியாற்றிப் பரீட்சித்துப் பார்க்கக் கூடியவாறு உருவாக்கப்பட்டிருக்கும். அந்த எண்ணிக்கை முடிவடைந்த பின்னர் அதனைப் பதிவு செய்து கொள்ள வேண்டும். அல்லது அதனைக் கணினியிலிருந்து அகற்ற வேண்டும்.

குறிப்பிட்ட காலக் கெடு முடிவடைந்த பின்னர் அதனை திறக்க முயற்சிக்கும் போது அது இயங்காமல் போகும் அல்லது ஏதேனுமொரு ஒரு பிழைச் செய்தியைக் காண்பிக்கும். சில ஷெயாவெயர்கள் முழுமையாக இயங்கக் கூடியவாறு வெளியிடப்படும். சில ஷெயாவெயர் மென்பொருள்க்ள் குறிப்பபிட்ட சில அமசங்கள் மட்டுமே இயங்குமாறு இருக்கும்.

பர்ம்வெயர்
கணினியைத் தயரிக்கும்போதே கணினி மத்ர்போர்டில் பொருத்தப்படும் ROM, PROM, EPROM, EEPROM போன்ற நினைவக சிப்புகளையே பர்ம்வெயர் (Firmware) எனப்படுகிறது. இந்த நினைவகங்கள் கணினி இயக்கத்துக்குத் தேவையான சில ப்ரோக்ரம்களை தன்னகத்தே கொண்டிருக்கும். இவை மின் இணைப்பு இல்லாமலேயே அவற்றில் அறிவுறுத்தல்களையும் கட்டளைகளையும் சேமித்து வைத்திருக்கும். எனினும் பர்ம்வெயர் ப்ரோக்ரமை நாம் மாற்றியமைக்க முடியாது. பர்ம்வெயருக்கு உதாரணமாக மதர் போர்டில் பொருத்தப்பட்டுள்ள பயோஸ் சிப்பைக் (Bios Chip) குறிப்பிடலாம்.

ப்ரீவெயர்
வியாபார நோக்கமின்றி இலவச பயன்பாட்டுக்கென உருவாக்கப்படும் மென்பொருள்களை ப்ரீவெயர் (Freeware) எனப்படுகிறது. இவற்றை இணையத்திலிருந்து இலவசமாகாவே டவுன்லோட் செய்து பயன் படுத்தலாம் அடுத்தவர்களோடு பரிமாறிக் கொள்ளலாம். ப்ரீவெயரில் உள்ள முக்கிய குறைபாடு யாதெனில் அதனை உருவாக்குபவர் தொடர்ச்சியாக அதனை விருத்தி செய்வதில்லை. அதேபோல் அதனைப் பயன் படுத்தும்போது ஏற்படும் சிக்கல்களுக்கு உதவிகள் வழங்கப்படு வதுமில்லை.

லைவ் வெயர்
இந்த லைவ் வெயர் (Liveware) எனும் சொல உங்களைத்தான் குறிக்கிறது. அதாவது பல்வேறு வகைப்பட்ட கணினிப் பயனர்களையும் குறிக்கும் ஒரே சொல் லைவ்வெயர்

 -அனூப்-